1Th 5 | KMG | STEP | Âgofâc-nane, dameŋte â šâfore dâŋ wemocte moc qâreŋke-ŋare mu?

1 Thessalonians 5

Wofuŋ dameŋ-ticne acmâc jaha maickeocmu

1 Âgofâc-nane, dameŋte â šâfore dâŋ wemocte moc qâreŋke-ŋare mu? 2 Ŋaŋac šiŋuc sâcne manaŋgopieŋ: Râsi jaŋe ŋafeo ututuŋ fisieŋgopieŋ, iŋuc jaha dameŋ-ticne ɋeŋfâfâc jaha maickeocmu. 3 Eme ŋic jaŋe aki wama sâko fokac muhuc mana fâsâerâ juhapie wiac hâhâwicnezi acmâc jaha fisi-jareocmu. Ŋokac kiwechec moc e gozi onšoŋ jaha kime fâfâreocmu, iŋuc jaha ŋic iŋucne jaŋe wiac onšoŋ jaha fua-jareme wemocko moc wiseniŋmu. 4 Âgofâc, ŋoŋe ine dapâcko mi juŋgopieŋ, irec wemocko Wofuŋte dameŋzi râsi iŋucne erâ ututuŋ maic-ŋopame bipic tatara eniŋmu. 5 Ŋoŋe tatamacte â šoaŋte kikefuŋ ekicne, nâŋâc ŋafere me dapâcte biŋe aricne.

Dameŋ mi manaŋgopeneŋte maŋɋâri juhuc ruc bazo

6 Irec ŋic gâcnezi guŋ fopie qâtec-joparâ guŋ mi fonšepeneŋ, rucgereŋ-nâŋec bahuc maŋte sowa junšepeneŋ. 7 Guŋ fofo jaŋe ŋafeo foeŋgopieŋ gae wowo jaŋe ŋafeo wohuc bâbâsifuc bâfuaeŋgopieŋ. 8 Ʒoaŋte biŋe ekicne nâŋâc ine maŋte sowa junšepeneŋ, ehuc mamanasiŋ â maŋjauŋ izi maruku enârezejec, â bâbâpiaŋte woworiczi dunâŋec ezejec. 9 I šiŋucte: Anutu e kimbeŋ-ticnere fârine hotâckenaŋte mâcne, Wofuŋ-nâŋec Jesu Kristore erâ bâbâpiaŋ rauckenaŋte muekac. 10 E hâcne okac-nâŋec hâmowec, i hâmohuc me ɋâricne juhuc ehec mâmâc junaŋte iŋuc ewec 11 Ŋoŋe irec hâcne faŋ qaqac â hehe šakiec eeŋgopieŋ iŋuc jaha ehuc junšepieŋ.

Micne bapa sâsec-jopahuc ŋic gâcne mâmâc bafic-jopazo

12 Âgo bureŋ, wiac mocte esoc-ŋopaŋgopeneŋ: Ŋoŋerao šâic gie baeŋgopieŋ â Wofuŋte erâ micne baŋareeŋgopieŋ â mu bâtiŋ eŋareŋgopieŋ i jaŋe sâsec-jopanšepieŋ. 13 Ehuc gie-jeŋicte erâ maŋjauŋ ejarehuc mana-jarepie fejâmbâŋkezejec. Erâ wâc wama qaqac ehuc junšepieŋ. 14 Âgofâc, hazec qâuŋ dâŋ moc ŋazape mananiŋ. Ŋic kosa jujune jaŋe uŋ sawaŋ ejarenšepieŋ, ŋic manabâcne jaŋe mu âkeriŋ ejarenšepieŋ, betaŋkekicne jaŋe dopec-jopanšepieŋ, erâ mâmâc hezu hemiriŋ ejarenšepieŋ. 15 Sâqocnere okac babazuc enšipiŋte sosoŋaŋ enšepieŋ. Ŋaŋackoaŋ â ŋic gâcne sasawa jaŋehec eehâmoc erâ erahuc junšepieŋ.

Faŋ qaqa dâŋ

16 Bubiaŋ faio jurâ jurahuc junšepieŋ. 17 Nunumu moc mi hetaranšepieŋ. 18 Wiac irec me irec daŋge mumuteŋ enšepieŋ, i Kristo Jesure erâ eniŋte Anutuzi muŋarekac. 19 Mârore šoc mi hehâponšepieŋ. 20 Anuture micdâŋ mufua-ŋarepie mana qâoma mi enšepieŋ. 21 Dâŋ sasawa mana wosâerâ bâtâc banšepieŋ, â biaŋne eme bajunšepieŋ. 22 Sâqocne fuŋne fuŋne ine qikiŋnenšepieŋ.

Jambuŋdâŋ

23 Anutu wama rune e jahac šure bâpiaŋ eŋareme maŋfuru ejâmbâŋkenšepieŋ, eme mâro â maŋ qâqâtâc â sahac-ŋeŋic furu fohame Wofuŋ-nâŋec Jesu Kristo ere fifisi dameŋko bahacmâc domanšepieŋ. 24 Hefârec-ŋopakac e mume sasanaŋ, irec gie-ticne baku batarocmu.

25 Âgofâc, ŋoŋe nâŋere erâ numunšepieŋ. 26 Opâ ruac ŋoŋe mitio meo babac efârenšepieŋ. 27 No Wofuŋte maio ŋaza sanaŋkepe: ŋoŋe papia kecši opâ ruac mâmâc sasawa wose-jarepie mananšepieŋ. 28 Wofuŋ-nâŋec Jesu Kristo ere aki anonoczi ŋoŋerao fotâcnerâ fozejec.